"Kak, tyang dot sajan milu care semetone lenan mespiritual, tangkil ke pura-pura, melukat ke beji-beji, pang taen napi nepukin Widhi. Jeg pragat kekene gen gaene, yan sing ngarit ke carik, ngempu pyanak di jumah. Wadih yan kekene ngewai Kak"
Megebris Pekak tyang kedek disubane mireng raos tyang buka keto, sambilange milpilang base misi gambir I Pekak lantas mesaut.....
"Hehehe..... Ngidaang cening tangkil ke pura-pura, lantas maduang rasa ditu, keto mase pepes ane madan mekedas-kedas ngeruruh genah melukat, mekejang ento mula melah Ning. Sakewale, yan sing nyidaang nuut pejalan buka keketo, eda sebet, eda kanti cening merasa wadih.
Spiritual buka penyambat care janine, liu bacakan panegesne. Spirit ento bisa mateges semangat. Yan care cening buka jani ngelah pyanak kurenan, ken-ken carane apanga sida tetep semangat, semangat ngalih gae, meburuh, ngarit, ape ja saluiring geginan, selegang mekejang ento. Nah saluiring mupu lantas geginane, ento anggo ngemertanin dewek ceinge, keto mase pyanak lan kurenan. Yan cening lantas nyambatang wadih ngempu, wadih ngarit, wadih ngelarang geginan urip, sujatine cening suba tusing ngelarang ane madan spiritual, ulian cening tusing buin semangat, tusing ngaad kenehe.
Pengartos spiritual ane len ade mase, Ning. Spirit meartos entitas, entitas ento pang aluh ban Kak nyambatang, mekejang ento ane ngawinang irage maurip. Sukeh ban nolih, sakewale iye ade. Dija ane maurip ento ngoyong? Dija-dija ade, di dewek ceninge ade, di padewekan pyanak kurenan mase ade. Selegang ngayahin pyanak kurenane, yan ngidaang buin, selegang ngayahin pisagane, pakedek pakenyung, ene sujatine suba madan spiritual, tepuk Widhine ane ada di tengah dewek I pyanak, kurenan, keto mase di tengah saluiring maurip ane lenan.
Buka penyambat pare wikane, dewa ade di deweke, yan sing ngidaang nuutin pejalan semetone metirta yatra lan seluirne, selegang dogen ngalih dewane ane di tengah, sambilang ngarit, sambilang ngempu, sambilang nyampat, sambilang ngumbah baju, sambilang ngujang ja, nak sida mase maduang rasa ajak Widhine, Ning.
Nah kema nake malu, jemak arit ajak keranjange, suud malu amonto ngorte, sampine suba gelur-gelur asane, uling dibi konden mentungin padang nang acekel hehehe.....
By Windhu Segara (FB)
